O‘zbekistondan Top-12 sovg‘alar: do‘stlar va tanishlarga qanday esdalik sovg‘alari olib kelish mumkin

Agar siz chet elda yashovchi do‘stlaringiz, hamkasblaringiz yoki uzoq qarindoshlaringizga milliy suvenirlar va xalq amaliy san’ati buyumlaridan qanday sovg‘a olib kelish haqida o‘ylayotgan bo‘lsangiz, biz eng yaxshi variantlar ro‘yxatini tuzdik. U yerda O‘zbekistondan har xil budjet va didga mos turli sovg‘alar jamlangan bo‘lib, ular sizga albatta yoqadi!

Kulolchilik buyumlari

Yorqin va betakror o‘zbek kulolchiligi hech kimni befarq qoldirmaydi va oshxona yoki mehmonxonaning interyeriga juda mos tushadi. Bundan tashqari, bunday esdalik unchalik qimmat bo‘lmaydi va yuklar orasida ko‘p joy egallamaydi. Suvenir sifatida piyola yoki laganlar to‘plami, guldon, meva idishi, palov lagani, choynak, bo‘yalgan sopol haykalchalarni olib kelishingiz mumkin.

Ular orasida eng mashhuri Rishton kulolchiligi bo‘lib, o‘ziga xos ko‘k-yashil bezaklar bilan ajralib turadi. Lekin, aslida, koʻp viloyatlarning oʻz hunarmandchilik anʼanalari mavjud, Samarqand, Toshkent, Gʻijduvon, Urgut va boshqalar aynan shular bilan mashhur. Toshkent kulolchiligi issiq ranglar gammasi bilan ajralib turadi. Gʻijduvon maktabi uchun esa sirlangan qoplama va oʻyib ishlangan bezaklar xosdir. Samarqandlik hunarmandlar ham sopoldan yasalgan haykaltaroshlik buyumlari — turli figuralar va kompozitsiyalar bilan mashhur. Seriyali ishlab chiqarilgan sopol buyumlar arzonroq boʻladi, biroq sovgʻa olish uchun imkoniyatingiz ko‘proq bo‘lsa, eksklyuziv buyumlar ham sotib olishingiz mumkin.

Ipak

Oʻzbek ipaklari har doim qadrlanib kelgan. Ayollar choponi, erkaklar to‘ni, shuningdek, nafis xonatlasdan tikilgan roʻmol yoki sharf universal sovgʻa boʻladi. Va moda tendensiyalariga mos keladi. Negaki, o‘zbek milliy naqshi ikat so‘nggi mavsumlarda moda namoyishlarida xit bo‘lmoqda. Shuningdek, siz dizayner do'konlarining assortimentini ham o‘rganishingiz mumkin. Yana bir maslahat: agar siz sovg‘a olmoqchi bo‘lgan do‘stlaringiz yoki qarindoshlaringizning oilasida ayollar tikishni bilsa, ular uchun eng yaxshi sovg‘a mato boʻlagi bo‘ladi va undan nima qilishni oʻzlari hal qiladilar.

Zardo‘zlik

Bu ham koʻp asrlik tarixga ega, chunki hozirgi Oʻzbekiston hududida zardoʻzlik markazlaridan biri joylashgan boʻlib, Buxoro amirining zardoʻzlik ustaxonasi azal-azaldan oʻz hunarmandlari bilan mashhur boʻlgan. Albatta, bugungi kunda hech kim boshdan-oyoq tilla kiyimda yurmaydi, ammo baxmal zardoʻzi to‘n yoki nimcha ajoyib sovgʻa boʻlishi mumkin. Shuningdek, esdalik sovgʻasi sifatida tilla naqshli doʻppi olib kelish yoki foydalanish uchun boshqa sovgʻa tanlash mumkin. Masalan, naqshli koʻzoynak qutisi, klatch yoki hamyon. Uy tekstili haqida ham unutmaslik kerak: agar doʻstlaringiz yoki qarindoshlaringiz turli interyer buyumlarini yaxshi koʻrsalar, ularga oltin kashtalar bilan bezatilgan yostiq jildlar yoki choyshab sovgʻa qilishingiz mumkin.

Gilamlar

Bu shunchaki esdalik emas, balki shohona sovgʻa bo‘ladi, uning variantlari va oʻlchamlari faqat sizning hamyoningizga bog‘liq. Buxorolik ustalarning qoʻlda toʻqilgan gilami haqiqiy shohona sovgʻa boʻlishi mumkin. Ular juda chiroyli bo‘lishidan tashqari, Buxoro junidan toʻqilgan gilamlar o‘z egalariga salomatlik baxsh etadi, deb ishonishadi. Fabrikada ishlab chiqarilgan gilamlar orasida ham jun, paxta, ipak yoki aralash tolalardan toʻqilgan juda qiziqarli namunalarni topish mumkin. Hech kimni befarq qoldirmaydigan yana bir esdalik — bu soʻzana (fors tilidan “igna bilan tikilgan” deb tarjima qilinadi) — kashta tikilgan panno yoki devor gilami. Qadimiy an'analarga koʻra, undagi bezaklarining har bir elementi alohida ma'noga ega.

Yog‘och o‘ymakorligi buyumlari

O‘ymakor ustalarning antiqa buyumlarini yana oʻzbek “yogʻochli toʻri” deb ham ataladi — u juda nozik va nafis koʻrinadi. Bunday jimjimador to‘rlar bilan qutichalar, jurnal stolchalari va tumbalar, ramkalar, qutilar, kitob uchun taglik – lavhlar va boshqa koʻplab buyumlar bezatiladi. Agar tanishlaringiz shaxmat yoki shashka ishqibozlari boʻlsa, ular oʻymakor figuralar toʻplamiga albatta yuqori baho beradilar. Gadjet ishqibozlari uchun esa mobil telefon yoki planshet uchun oʻymakor taglik sotib olish mumkin.

Kandakorlik

Kandakorlik o‘zbek hunarmandlarining yana bir milliy iftixori bo‘lib, o‘rta asrlarda o‘zining yuksak cho‘qqisiga chiqqan qadimiy hunarmandchilik turidir. Buxoro va Xiva maktabi kandakorlari ayniqsa mashhur. Esdalik sifatida choy idishi yoki idishlar to‘plami, lagan, likopchalar — oshxona uchun yoki devoriy dekoratsiya sifatida, mayda buyumlardan — tuzdonlar, qayladonlar, ziravor uchun to‘plamlar sotib olishingiz mumkin.

Eksklyuziv zargarlik buyumlari

Chet ellik do‘stlar uchun sovg‘a sifatida suvenirlar tanlayotganda, ularning oilasidagi ayollar haqida unutmang. O‘zbekistonda milliy uslubdagi zargarlik buyumlarini – mis, jez qotishmalari yoki toshlar bilan bezatilgan kumush taqinchoqlar yoki ularga moslangan zargarlik buyumlarini arzon narxda xarid qilishingiz mumkin. Oilaga farovonlik keltiruvchi va salomatlikni mustahkamlovchi an'anaviy “ayollar” toshi – serdolikli zargarlik buyumlariga e'tibor bering.

Tarixiy va milliy liboslardagi qo‘g‘irchoqlar

Bunday sovg‘a bolalarga ham, kattalarga ham yoqadi. U uslubidan qat'i nazar, har qanday interyerga mos tushadi. Va shu bilan birga, u do‘stlaringiz yoki qarindoshlaringizning uyini qo‘riqlaydigan va sizni eslatib turadigan tumorga aylanadi.

Pichoqlar

Agar zargarlik buyumlari oilaning ayollari tomonidan qadrlansa, erkaklar milliy o‘zbek pichog‘iga befarq qolmaydi. Qo‘lda yasalgan Chust pichoqlari ayniqsa mashhurdir. Haqiqiy san'at asariga teng — o‘yma va naqshli sovg‘a g‘ilofidagi suvenir pichog‘ini sotib olish mumkin. Yoki yanada foydali va funksional variant: Chust hunarmandlari yillar davomida o‘tkirligini saqlab qoladigan ajoyib oshxona pichoqlarini ham yasaydilar. Sotib olayotganda sertifikat olishni unutmang — pichoqni O‘zbekistondan olib chiqish uchun. Va, albatta, parvoz paytida uni yuklar bo‘limiga topshirishingiz kerak bo‘ladi.

Samarqand shoyi (aniqrog‘i tut) qog‘ozi

Ushbu sovg‘a o‘z qo‘llari bilan biror narsa qilishni yaxshi ko‘radiganlarga ma'qul keladi. Qog‘oz qadimiy texnologiyadan foydalangan holda tut daraxtidan qo‘lda tayyorlanadi va juda mustahkam bo‘ladi, hatto yuvsangiz ham hech narsa qilmaydi. U otkritkalar, xattotlik, rasm chizish uchun ishlatilishi mumkin. Shuningdek, tayyor suvenirlarni sotib olish mumkin — masalan, dekorativ niqoblar, sovg‘a paketlari yoki sumkalar.

Cholg‘u asboblari

Do‘mra, tanbur yoki surnay kabi milliy cholg‘u asboblari yoki ularning kichik nusxalari hamyoningiz ko‘tarsa va shu bilan birga kimnidir hayron qoldiradigan narsa topa olmayotgan bo‘lsangiz, yaxshi sovg‘a bo‘lishi mumkin. Va agar u inson antiqa narsalarni to‘plashga ishtiyoqi bo‘lsa, bunday sovg‘a, albatta, uning kolleksiyadan munosib o‘rin egallaydi.

Yeyish mumkin bo‘lgan suvenirlar

Eng oson va arzon variant — biron mazali narsa olib kelish. Agar chet ellik tanishlaringiz yoki uzoq qarindoshlaringiz hech qachon O‘zbekistonda bo‘lmagan bo‘lsa, unda ularga uzum sharbati, novvot, sutli holva, xashtak, o‘zbek rohat-luqumi, qadimiy texnologiya bo‘yicha tayyorlangan haqiqiy parvarda va boshqa shirinliklarni tatib ko‘rishga qiziqadilar. Agar O‘zbekistonga kelgan va bu shirinliklardan yegan bo‘lsalar, ehtimol bunday “shirin va mazali” suvenirdan boshlari osmonga yetadi, chunki ularni chet elda tatib ko‘ra olmaydilar.