Bajarilgan ishlar dalolatnomasi: ta’rifi, 2024-yil namunasi va to‘ldirish tartibi

Dizayner mijozning ofisidagi interyerni yangiladi, so‘ng ikkala tomon ham bajarilgan ishlar dalolatnomasini imzoladi. Bu hujjat barcha tomonlar bajarilgan majburiyatlardan mamnun ekanligidan dalolat beradi.

Ekspert Anna Ufimseva, Business Explorer QK rahbari bilan birgalikda bu qanday hujjat ekanligi, qachon kerakligi va qanday to‘g‘ri rasmiylashtirish haqida bilib olamiz.

Bajarilgan ishlar dalolatnomasi nima

Bu ikki tomonlama shartnoma bo‘yicha hisobot hujjati bo‘lib, ijrochi tomonidan ish yakunlanganligi va buyurtmachi tomonidan qabul qilinganligini tasdiqlaydi.

Shuningdek, quyidagi nomlar ham uchraydi:

• bajarilgan ishlarni qabul qilish va topshirish to‘g‘risidagi dalolatnoma;
• ishlarni topshirish-qabul qilish dalolatnomasi;
• bajarilgan ishlarni qabul qilish va topshirish dalolatnomasi;
• ishlarni topshirish va qabul qilish dalolatnomasi;
• bajarilgan ishlarni topshirish to‘g‘risidagi dalolatnoma;
• ishlarni qabul qilish va topshirish dalolatnomasi

Dalolatnoma alohida hujjat emas, balki shartnomaga qo‘shimcha hisoblanadi.

Dalolatnoma nima uchun kerak

Bunday hujjat batafsil hisobot va shaffoflik zarur bo‘lgan biznesda har ikki tomonning huquq va manfaatlarini himoya qilish uchun muhim vositadir.

Bu nima uchun kerak:

• bu ishning o‘z vaqtida va sifatli bajarilganligining yuridik tasdig‘i hisoblanadi. Hujjat buyurtmachini ham, ijrochini ham himoya qiladi: birinchisi ish sifati kutilganidek bo‘lmasa, haq to‘lamasligi, ikkinchisi esa o‘z xizmatlari uchun haq talab qilishi mumkin;
• bu hujjat asosida pudrat shartnomasi bo‘yicha tomonlar o‘rtasida yakuniy hisob-kitob amalga oshiriladi;
• buxgalteriya hisobini yuritishga yordam beradi. Bu hujjat bilan qanday xizmatlar ko‘rsatilganligi va qanday mablag‘lar sarflanganligini kuzatish osonroq;
• tushunmovchiliklar va sud jarayonlarining oldini olish imkonini beradi. Agar ish sudgacha yetkazilsa, dalolatnoma buyurtmachi bajarilgan ishlarni tasdiqlaganligining dalili bo‘ladi. Bu hujjatsiz sud ishlarni qabul qilinmagan deb hisoblaydi. Bu pudratchi uchun xavfli: nafaqat ish haqini olmasligi, balki ishlar bajarilganligini va shartnoma mavjudligini isbotlay olmasligi mumkin. Buyurtmachi uchun xatarlar kamroqdir, biroq dalolatnomasiz unga ham bitim haqiqiyligini isbotlash qiyin bo‘ladi.

Dalolatnoma qanday tuziladi

Dalolatnomani tuzishda hujjat aylanishining tasdiqlangan qoidalari va standartlariga rioya qilish muhimdir.

Unda quyidagi bandlar bo‘lishi kerak:

• raqami va imzolangan sanasi;
• shartnoma raqami;
• ishlarni bajarish muddatlari;
• bajarilgan ishlar hajmi;
• ishlar narxi;
• tomonlar to‘g‘risidagi ma'lumotlar. Hisobga olish va ro‘yxatdan o‘tkazish hujjatlariga muvofiq buyurtmachi va ijrochining to‘liq yuridik nomlari;
• sifat mezonlari. Buyurtmachi shikoyatlar yo‘qligini tasdiqlaydi yoki aniqlangan barcha kamchiliklarni ularni bartaraf etish muddatlarini ko‘rsatgan holda qayd etadi;
• kafolat majburiyatlari;
• dalolatnomaning qonuniyligini tasdiqlovchi muhrlar va imzolar.

Dalolatnomada xizmat yoki ish mazmuni qanday ko‘rsatiladi

Xizmat yoki ishning aniq tavsifi katta ahamiyatga ega. “__ sanadagi __-sonli shartnoma bo‘yicha xizmatlar” kabi umumiy iboralarni qo‘llash o‘rniga, aniq ma'lumotlarni: shartnoma raqami, sanasini keltirish, shuningdek, xizmat yoki ishni batafsil tavsiflash va bajarish vaqtini ko‘rsatgan ma'qul. Masalan, “2024-yil 01 iyundagi 22-son shartnoma bo‘yicha 2024-yil iyun oyida ofis binosini ta'mirlash”.

Shartnoma va dalolatnomadagi nom va narxlar bir xil bo‘lishi kerak. Shartnomada tomni ta'mirlash ishlari bayon etilgan bo‘lsa, dalolatnomada ham shu so‘zlar qo‘llaniladi. Nomini “Qurilish ishlari” deb o‘zgartirish nazorat qiluvchi organlar tomonidan qo‘shimcha savollarga olib kelishi mumkin.

Ta'riflovchi qismi rekvizitlar va jadvaldan iborat bo‘lgan dalolatnomadan foydalanish tavsiya etiladi. Asosiy matnda ma'lum bir shartnomaga havola qilish mumkin, masalan, “2024-yil 15 iyuldagi 14-sonli xizmat ko‘rsatish shartnomasi bo‘yicha bajarilgan ishlar dalolatnomasi”. Jadval nafaqat ish hajmi va narxini, balki bajarish muddatlari va sifat talablarini ham qulay aks ettirish imkonini beradi.

Jadvalda nima va qanchalik yaxshi bajarilganini yaqqol ko‘rsatilgan

“Ishlarning nomi va sifati ko‘rsatilgan ustunlarni to‘ldirishda, ayniqsa, e’tiborli bo‘lish kerak, chunki bu ma’lumotlar sud jarayonida asosiy dalillar bo‘ladi”.

Anna Ufimseva

20 yillik tajribaga ega buxgalter, Business Explorer QK rahbari

Dalolatnomaga kamchiliklar to‘g‘risidagi ma'lumotlarni kiritish kerakmi

Dalolatnomada nafaqat ishni topshirish holati, hajmi va sifatini qayd etish, balki yuzaga kelishi mumkin bo‘lgan kamchiliklarni ham ko‘rsatish muhimdir. Buyurtmachi ishlarni qabul qilganda, talablar to‘liq yoki qisman bajarilganligini qayd etadi. Shuningdek, buyurtmachi e'tirozlari yo‘qligini tasdiqlashi yoki aksincha, barcha kamchiliklarni va ularni bartaraf etish muddatlarini ko‘rsatishi mumkin.

Hujjatda bunday vaziyatlar uchun oldindan alohida joy ajratish tavsiya etiladi. Aks holda, buyurtmachida e'tirozlar paydo bo‘lsa, o‘z huquqlarini himoya qilish qiyin bo‘lishi mumkin. Buyurtmachi ishlar yomon yoki to‘liq bajarilmagan deb hisoblasa, dalolatnomani imzolamasligi va xatolarni tuzatishni talab qilishi mumkin. Kamchiliklar bartaraf etilgandan so‘ng joriy sana bilan yangi dalolatnoma tuziladi.

2024-yilgi bajarilgan ishlar dalolatnomasi blanki

Qonunchilikda hujjat uchun majburiy shablon belgilanmagan, bu o‘z tuzilmalarini ishlab chiqish va ixtiyoriy shaklda rasmiylashtirish imkonini beradi.

Hujjat shunday ko‘rinishda bo‘lishi mumkin

Bajarilgan ishlar dalolatnomasining to‘ldirilgan namunasi

Dalolatnoma ikki formatdan birida: qog‘oz yoki elektron shaklda taqdim etiladi. Quyida to‘ldirilgan elektron hujjat namunasi keltirilgan.

Elektron variant elektron-raqamli imzo bilan imzolanadi. Bajarilgan ishlar yoki ko‘rsatilgan xizmatlarni batafsil bayon qilish muhimdir

Bosma shaklda dalolatnoma A4 formatdagi standart varaqda rasmiylashtiriladi. Blankni oldindan chop etib, qo‘lda to‘ldirish yoki avval barcha ma'lumotlarni elektron shaklda kiritish, so‘ngra chop etib, imzolash mumkin. Bu jarayon uchun alohida qoidalar belgilanmagan.

Bajarilgan ishlar dalolatnomasi haqida qisqacha

• Bajarilgan ishlar dalolatnomasi — shartnoma bo‘yicha ishlar yoki xizmatlar bajarilganligining asosiy tasdig‘idir. Biroq moliyaviy va soliq operatsiyalarini amalga oshirish uchun asos hisoblanmaydi, buning uchun hisobvaraq-faktura mavjud. Dalolatnoma bajarilgan ishlarning hajmi va sifatini qayd etadi hamda sud nizolari yuzaga kelgan taqdirda tomonlarni himoya qiladi.
• Dalolatnomada shartnoma va ishlar to‘g‘risidagi barcha ma'lumotlar, jumladan ularning qiymati, muddati va hajmi ko‘rsatilishi kerak. Nizolarni oldini olish uchun hujjat va shartnomadagi ishlar o‘tkazilishi to‘g‘risidagi ma'lumotlar bir xil bo‘lishi muhimdir. Dalolatnomani rasmiylashtirish jarayonida , ayniqsa kamchiliklarni va bajarilgan ish sifatiga qo‘yiladigan talablarni ko‘rsatish qismida, tafsilotlarga e'tibor va to‘ldirishda aniqlik talab etiladi.