Sergey Borodinning «Звезды над Самаркандом» tarixiy romanlar turkumi buyuk sarkarda va davlat arbobi Amir Temur hayotiga bag‘ishlangan. Hindistondan O‘rta yer dengizigacha bo‘lgan ulkan hududlarni o‘ziga bo‘ysundirgan Sohibqiron haqidagi ushbu asar muallifning tarixni, o‘sha davr turmushi va urf-odatlarini chuqur o‘rganishi, shuningdek, Sharq va uning boy madaniy merosiga bo‘lgan samimiy muhabbati samarasidir.
Amir Temur davrini imkon qadar haqqoniy va xolis tasvirlash maqsadida yozuvchi Sohibqiron qo‘shinlari bosib o‘tgan yo‘llar bo‘ylab safar qilgan. U Italiya, Armaniston, Ozarbayjon, Gruziya, Afg‘oniston, Eron, Iroq, Suriya, Turkiya, Shimoliy Afrika va Yugoslaviyada bo‘lgan. Misr, Turkiya va Tunis kutubxonalarida tarixiy manbalarni o‘rgangan, Rimdagi mashhur Vatikan kutubxonasida ham ko‘p vaqtini izlanishlarga bag‘ishlagan.
Yigirma yildan ortiq davom etgan mehnat natijasida bir necha romandan iborat turkum dunyoga keldi. Afsuski, yozuvchi uning to‘rtinchi romanini yakunlashga ulgurmagan. Shunga qaramay, «Звезды над Самаркандом» tarixiy nasrning yorqin namunalaridan biriga aylandi. O‘sha davr hayotini badiiy mahorat bilan aks ettirishi va tarixiy manbalarga sodiqligi bilan ushbu asar alohida qadrlanadi.
Mazkur nashrdan turkumning dastlabki ikki romani — «Хромой Тимур» va «Костры похода» o‘rin olgan.

