Nega jiraf o‘z quloqlarini yalay oladi? Fillar arqondan sakray oladimi? Quyonlar nima uchun o‘z axlatini yeydi? Kitob aynan shunday hayratlanarli savollardan boshlanadi va bolalarni atrofimizdagi olamni yangicha kashf etishga chorlaydi. Muallif Matilda Masters 320 ta qiziqarli savol va javob orqali hayvonlar, inson tanasi, o‘simliklar, tabiat va kundalik hayotimizdagi noodatiy hodisalar haqida hikoya qiladi.
Kitob 12 ta mavzuli bo‘limdan iborat. Unda hayvonlarning g‘aroyib xususiyatlari, inson tanasining sirlari, sport, mashhur insonlar, tarixiy voqealar, Yer sayyorasi va turli mamlakatlar haqida ma’lumotlar berilgan. Shuningdek, ilm-fan mo‘jizalari, til va so‘zlarning kelib chiqishi, o‘simliklar, oziq-ovqat hamda koinotga bag‘ishlangan bo‘limlar ham bor. Masalan, jirafaning tili yarim metrgacha yetishi, ko‘k kitning oziqlanishi, sayyoralar va yulduzlar o‘rtasidagi farqlar kabi qiziqarli faktlarni bilib olasiz.
Har bir savolga sodda, tushunarli va ko‘pincha kulgili misollar bilan javob beriladi. Rang-barang rasmlar esa ma’lumotlarni yanada qiziqarli qiladi. Bu kitob faqat bolalar uchun emas, balki farzandi bilan birga yangi bilimlarni o‘rganishni istaydigan ota-onalar uchun ham ajoyib tanlov. Siz bu kitobni ochganingizda, birinchi bo‘lib qaysi savolga javob topishni xohlaysiz?

