Latte omili - Devid Bax & Jon Devid Mann

Oylikdan oylikkacha yashashdan charchadingizmi? Moliyaviy erkin bo‘lishni istaysiz, ammo ishni nimadan boshlashni bilmaysizmi? Agar shunday bo‘lsa, unda «Latte omili»ni o‘qishingiz kerak.

Badavlat bo‘lmay turib ham boy yashash mumkinmi? Albatta, mumkin. Buning uchun maoshingizni oshirishlarini, lotereyaga yutuq chiqishi yoki kutilmagan xazina topib olishni kutishga hojat yo‘q.

Ko‘pchilik bir umr boshqalarni boy qilish uchun ishlaganini juda kech tushunadi. Natijada o‘zini hech qachon badavlat bo‘lolmaydigan muhtoj odamdek his etib, barcha istaklarini noaniq muddatga ortga suradi...

Ushbu kitob qahramoni ham «Qurbim yetmaydi» deya ko‘p narsada, hatto orzularida ham o‘ziga cheklovlar qo‘ygan. U tasodifan tanishib qolgan keksa barista esa qizga o‘zi o‘ylaganidan ancha badavlatroq ekanini tushuntirib beradi.

Kitobda Devid Bax «Latte omili» konsepsiyasini keltiradi. Bu kichik, arzimas ko‘rinadigan xarajatlar vaqt o‘tishi bilan ko‘p miqdordagi pulga aylanishi mumkinligini ko‘rsatib beradi. Masalan, agar siz kuniga 5 dollarni kofega sarf qilsangiz, bu yil davomida 1825 dollar bo‘ladi. Agar siz buning o‘rniga pulni sarmoyaga sarflasangiz, u vaqt o‘tishi bilan katta summaga aylanishi mumkin.