Jannat onalar oyog'i ostida

Яқинда Марказий осиёлик кино санъати мутахассис ва мухлислари навбатдаги шов-шувларга гувоҳ бўлди: қирғиз қардошларимиз томонидан яратилган “Жаннат оналар оёғи остида” деб номланган кинофильм жуда қисқа фурсатда довруқ таратиб, Ўзбекистон, Қозоғистон, Туркия, Ироқ, Афғонистон, Покистон, Озарбайжон, Саудия Арабистонгача кезиб чиқди. Зеро ислом қадрятлари акс этган нарса борки, кўкка кўтарилиб келади доим.

Фильмда кўплаб давлатларни, жумладан, Қирғизистон, Ўзбекистон, Қозоғистон, Туркия, Мисрни пойи пиёда босиб ўтиб, Саудия Арабистони (муборак ҳаж зиёрати)га йўлга чиққан беғубор бола — ақлий ривожланиш бўйича 8 ёшда бўлган, лекин 35 ёшли Одил ва унинг меҳридарё онаси ҳақида ҳикоя қилинади.

...Одил ўртоғи Самирнинг гапига кириб, агар онасини Маккага пиёда элтса, волидаи муҳтарамаси билан биргаликда жаннатга кириши учун елиб-югуради. Кечани кеча, кундузни кундуз демай, ана шундай ёруғ хаёл илинжида юрган болакайнинг орзулар осмонини кунпаякун қилишни истамаган она ҳам беэътибор бўлса-да ўғли билан сафарга чиқишга кўнади. Аммо Ўзбекистонга келганларида унинг ўша кунгача бутун вужудини эгаллаб олган оддий ўй-хаёлларини бир ҳожи ота мустаҳкамлаб беради. Улар эса яна дадил, шоша-пиша йўлларида давом этаверишади.

“Йўл азоби - гўр азоби” деганларидек, сафар давомида она-бола террорчилардан тортиб, ваҳший бўриларгача дуч келишади. Сувсизлик азоблари, оғир машаққатларга тишларини тишларига қўйганча чидашади. Асарда Одилнинг матонатига, болалардек содда феълига кулмаслик ва йиғламаслик мумкин эмас.